BUSOKELO DC KUSAKA VIPAJI VYA MPIRA KWA VIJANA, YAHIMIZA UMUHIMU WA MICHEZO KATIKA MAENDELEO.

Imewekwa tarehe: February 12th, 2026

BUSOKELO DC KUSAKA VIPAJI VYA MPIRA KWA VIJANA, YAHIMIZA UMUHIMU WA MICHEZO KATIKA MAENDELEO.

Halmashauri ya Wilaya ya Busokelo inatarajia kuzindua programu ya kusaka na kuibua vipaji vya mpira wa miguu kwa vijana wa wilaya hiyo, ikiwa ni sehemu ya mkakati wa kuimarisha sekta ya michezo na kukuza vipaji vya vijana ngazi ya jamii.

Akizungumza kuhusu zoezi hilo, Afisa Maendeleo ya Michezo wa Halmashauri ya Wilaya ya Busokelo, Bw. Lewis Mwasekaga, amesema kuwa programu hiyo inatekelezwa kwa kushirikiana na Kocha Geofray Katepa, kocha wa zamani wa Mbeya City na Karonga United, kwa lengo la kutambua, kulea na kukuza vipaji vitakavyoiwakilisha Busokelo katika mashindano mbalimbali.

Kwa mujibu wa ratiba iliyotolewa, zoezi la kusaka vipaji litafanyika katika vituo mbalimbali kama ifuatavyo: Februari 21, 2026 katika Shule ya Sekondari Ntaba; Februari 22, 2026 katika Shule ya Msingi Lupata; Februari 28, 2026 katika Shule ya Msingi Kandete; na Machi 01, 2026 katika Shule ya Msingi Lwangwa. Zoezi litaanza saa 2:00 asubuhi katika kila kituo.

Bw. Mwasekaga amewahimiza wazazi na walezi kuwahamasisha watoto wao kushiriki katika majaribio hayo ili kuwapa fursa ya kutimiza ndoto zao kupitia michezo. Amesema michezo si burudani tu, bali ni nyenzo muhimu ya maendeleo ya kijamii na kiuchumi.

Michezo ina mchango mkubwa katika maisha ya vijana na jamii kwa ujumla. Kwanza, huimarisha afya ya mwili na akili kwa kupunguza magonjwa yasiyoambukiza na kuongeza nidhamu binafsi. Pili, hujenga maadili mema kama ushirikiano, uvumilivu, uongozi na kujituma.

Aidha, michezo hutoa ajira na kipato kwa vijana wenye vipaji, huku ikitangaza wilaya na taifa kwa ujumla kupitia mashindano ya kitaifa na kimataifa. Kupitia programu kama hii, Halmashauri ya Wilaya ya Busokelo inalenga kuandaa kizazi chenye afya, nidhamu na uwezo wa kujiajiri au kuajiriwa kupitia sekta ya michezo.

uwekezaji katika michezo ni uwekezaji katika maendeleo ya vijana na ustawi wa jamii nzima.